नागपूर कृषि उत्पन्न बाजार समिती, सन 1974 मध्ये महाराष्ट्र कृषि उत्पन्न विपणन नियम 1963 च्या कायद्यांतर्गत प्रस्थापीत झाली. त्या आधी व नंतरही नागपूर शहरांत धान्य उपबाजार, संत्रा व फळे उपबाजार, आलु-कांदा उपबाजार, मिरची व गुरे उपबाजार वेगवेगळया ठिकाणी भरत होते. बाजार समिती प्रस्थापीत झाल्यानंतर हे सर्व उपबाजार एकाच ठिकाणी एकत्र आणावे म्हणून पदाधिका-यानी नागपूर सुधार प्रन्यासकडून जागेची मागणी केली.

उपबाजारांच्या परिस्थितीचा विचार करून व त्यांचे गांभीर्य लक्षांत घेवून नागपूर सुधार प्रन्यासने बाजार समितीला 1981 साली 110 एकर जागा दिली. बाजार समितीला 110 एकर जागा मिळाल्यानंतर मे. किर्लोस्कर कन्सलटंटस्, पुणे यांना फिजीबिलिटी व झोनल प्लॅन रिपोर्ट सादर करण्याकरीता आमंत्रित केले. त्यानुसार त्यांनी 1981-82 मध्ये बाजार समितीला फिजिबिलिटी व झोनल प्लॅन रिपोर्ट सादर केला.

फिजिबिलिटी व झोनल प्लॅन रिपोर्ट प्राप्त झाल्यानंतर बाजार समितीने भारतातील सुप्रसिध्द वास्तुशिल्पकार मे. शिवदानमल मोखा,नागपूर याचेकडे बांधकामाचा आराखडा तयार करण्याची जबाबदारी सोपविली. ईमारतीचा बांधकाम आराखडा तयार झाल्यानंतर व नागपूर सुधार प्रन्यासने बांधकाम करण्याकरीता मंजूरी प्रदान केल्यानंतर बाजार समितीने सन-1988 ते 1992 पर्यत 34 कोटी रूपये खर्च करून पं.जवाहरलाल नेहरू मार्केट यार्ड वर बांधकाम केले. सर्व उपबाजार (इतवारी धान्य बाजार व भाजी बाजार सोडून) नागपूर शहरांतून पं.जवाहरलाल नेहरू मार्केट यार्ड, कळमना या ठिकाणी शासकीय अधिसुचनेनुसार स्थानांतरीत करण्यांत आले.

बाजार समितीने स्वत:च्या निधीतून बाजार उभारणी व बांधकामावरील विकास कार्य केलेले आहे. बाजार समितीवर कोणाचेही कर्ज किंवा अनुदान नाही तसेच बाजार आवारातील सर्व सुविधा आणि सेवा समितीच्या स्वत:च्या उत्पन्नातून निर्मित आहे.